varnir gegn snjóflóðum og skriðuföllum o.fl. Frú forseti. Ég vil byrja á að þakka hæstv. ráðherra fyrir framsöguna á þessu ágæta máli. Mig langar að taka boltann þar sem skilið var við hann hér af síðasta ræðumanni, þ.e. hæstv. ráðherra og sömuleiðis hv. þm. Guðlaugi Þór Þórðarsyni. Ég skil hæstv. ráðherra mjög vel varðandi forgangsröðun á þeim verkum sem hægt er að fara í. Við þekkjum það líka að með breytingu á tíðarfari erum við sömuleiðis að glíma við allt aðrar aðstæður en þegar farið var af stað á sínum tíma þegar það var fyrst og fremst verið að horfa til þess að verjast snjóflóðum. Ég held að það sé mjög mikilvægt í því samhengi í vinnu þeirrar hv. nefndar sem tekur þetta mál að lokinni þessari umræðu að farið verði gaumgæfilega yfir það hvar hugsanlega þessar hættur eru. Vissulega eru það þessi aurflóð sem væntanlega orsakast af því að sífreri til fjalla er að gefa eftir. Við búum nú einu sinni þannig hér á þessu landi að flestar byggðir eða mjög stór svæði eru akkúrat þarna undir þó svo að það sé ekki fyrir hendi hætta á snjóflóðum. Þetta held ég að sé mjög mikilvægt að skoða. Í lokin á fyrra andsvari til hæstv. ráðherra vil ég spyrja hvort einhverjar greiningar liggi fyrir í ráðuneytinu sem snúa að því fjármagni sem við gætum hugsanlega þurft að nýta í framhaldinu ef við tækjum þá stærri skref. En ég ítreka það, frú forseti, að ég skil mjög vel forgangsröðun ráðherra í þessu máli. Ég held að það sé mjög mikilvægt samt að nefndin fari ofan í þetta svona hvað í framtíðinni.