varnir gegn snjóflóðum og skriðuföllum o.fl. Virðulegur forseti. Ég tek undir með hv. þingmanni. Ég vil líka nýta tækifærið og segja að ég held að við Íslendingar getum verið mjög stoltir af þeirri umgjörð sem við höfum byggt utan um ofanflóðavarnir, af lagaumgjörðinni og starfseminni og þeim varnarvirkjum sem við höfum reist í gegnum tíðina og hafa aftur og aftur sannað gildi sitt. En það er auðvitað þannig að það þarf alltaf að forgangsraða. Það eru fórnarskipti í þessu eins og öðru þegar kemur að því að ákveða hvernig fjármunir eru nýttir og skriðuföll eru auðvitað eitthvað sem þarf að kortleggja sérstaklega. Þar sjáum við aukna ógn vegna loftslagsbreytinga. Landslagið okkar er að breytast. Náttúran er að breytast vegna loftslagsbreytinga og þá þurfum við að gæta þess að lagaumgjörðin um ofanflóðavarnir fylgi í kjölfarið þannig að við séum alltaf einu skrefi á undan náttúruöflunum.