bann við hvalveiðum Frú forseti. Ég vil þakka hæstv. mennta- og barnamálaráðherra fyrir ærlegt svar. Mig langar samt til að benda hæstv. ráðherra á að það er ekki rétt hjá hæstv. ráðherra að dauðastríðið taki að jafnaði tuttugu mínútur til hálftíma í hvert sinn sem hvalur er skotinn. Það er ekki alls kostar rétt og það er reyndar kolrangt. Langstærstur hluti dýra deyr strax við fyrsta skot og kvelst í rauninni ekkert svo fleiri mínútum skiptir, alls ekki. En ber mér þá að túlka þau orð hæstv. ráðherra þannig að ef það er rétt að við náum að skjóta þessi dýr og jafnvel finna upp mannúðlegri aðferðir við aflífun þá getum við treyst á stuðning hæstv. mennta- og barnamálaráðherra við hvalveiðar í komandi framtíð og að hún muni segja nei við frumvarpi hæstv. atvinnuvegaráðherra?