málaflokkur útlendingamála Virðulegur forseti. Ég þakka hæstv. ráðherra fyrir að minna á málefnalega og góða afstöðu Miðflokksins í þeim málum sem hann ræðir um, enda er okkar markmið að fara í grunnrót vandans í útlendingamálum, sem er t.d. sú rót vandans að við séum yfirleitt að taka kerfisbundið við hælisumsóknum á Íslandi sem við viljum hætta en hæstv. dómsmálaráðherra vill ekki. En það er önnur saga. Úr því að manni gefst tími hér í seinni fyrirspurn þá vildi ég forvitnast um nýframkomnar hugmyndir starfshóps um að draga stórlega úr vægi og áhrifum landsbyggðarinnar á íslenska stefnumótun, þ.e. fækkun landsbyggðarþingmanna. Þetta eru tillögur sem virðast hafa verið tilbúnar fyrir nokkru en eru komnar í fjölmiðla núna af einhverjum ástæðum, einmitt á sama tíma og þetta mál er horfið af þingmálaskrá. Ég vildi forvitnast um það hjá hæstv. ráðherra, ekki að maður trúi því að þetta ólánsmál fari í gegn á þessu kjörtímabili, en hvers vegna Viðreisn vill láta virðast sem svo að það gæti stefnt í það á þessu stigi? Við vorum að enda hérna mikla hópeflistilraun Viðreisnar í Evrópumálunum og maður veltir fyrir sér: Af hverju þetta mál, sem eru engar vísbendingar um að geti raunverulega farið hérna í gegn, hvort sem er í ríkisstjórn eða í gegnum Alþingi á þessu kjörtímabili, er tekið upp núna? Er það í von um að raunverulega gera það eða sannfæra kjósendur Viðreisnar e.t.v. um að þeir hafi fengið eitthvað upp úr krafsinu með því að kjósa Viðreisn annað en sífelldar gjalda- og skattahækkanir?