atvinnustarfsemi á haf- og strandsvæðum Virðulegi forseti. Ég þakka hæstv. ráðherra fyrir svarið. Það er vissulega jákvætt að það sé vinna í gangi. Það eru þessar ábendingar, það er auðvitað fjöldi ábendinga í kjölfar skýrslu Ríkisendurskoðunar sem þarf að fara yfir og þó svo að það sé ekki búið að gera þær úrbætur þá halda leyfisferli áfram. Mig langar að spyrja hæstv. ráðherra, í ljósi þess að ég veit að flokkur ráðherra lagði áherslu á að framtíð fiskeldis byggðist á traustu eftirliti, vöktun, rannsóknum og að greinin stæðist ýtrustu umhverfiskröfur, sem ég held að séu kröfur sem allir geti tekið undir, hvort hæstv. ráðherra hafi ekki talið það skynsamlegast að hraða slíkri vinnu í ljósi þess að hún þarf ekki lagabreytingar og hvort það hefði kannski ekki verið eðlilegt að klára það áður en slíkar stórar leyfisveitingar eru veittar eða farið í þær. Mig langar að ítreka hér að auðvitað snýst þetta ekki um hvort menn séu með eða á móti fiskeldi. Þetta snýst um það að fyrirtækin geti treyst á stöðuga lagaumgjörð. Þetta snýst um að það sé skýrleiki fyrir samfélög og líka að það sé verið að horfa á þetta allt í samhengi við umhverfið.