endurskoðun á rekstrarumhverfi fjölmiðla Frú forseti. Ég þakka hv. framsögumanni, Hildi Sverrisdóttur, kærlega fyrir hennar ítarlegu framsögu þessa frumvarps sem hér er lagt fram af hálfu nokkurra þingmanna Sjálfstæðismanna. Ég tek undir með framsögumanni, það er auðvitað mjög mikilvægt að fjölmiðlaumhverfi hér á landi sé heilbrigt og frjálst. Svo er ekki og mér heyrist á framsögumanni að hún hafi raunverulega verið að leggja þetta frumvarp fram til að koma á einhvers konar jöfnun hvað þetta varðar. Það er alveg augljóst öllum sem fylgjast með fjölmiðlum að fjölmiðlamarkaðurinn hér er mjög skekktur og þar er helst þetta gífurlega stóra gímald sem þarna er, RÚV, sem gín yfir þessum markaði, eins og ég myndi orða það. Ég vil spyrja hv. framsögumann nokkurra spurninga. Þarna leggja hv. þingmenn fram breytingu í þá veru að starfsmenn Ríkisútvarpsins verði í raun ríkisstarfsmenn og Ríkisútvarpið falli bara undir fjárlög eins og hver önnur stofnun. Ég velti aðeins fyrir mér: Verður þetta þá ekki erfiðara? Verður ekki erfiðara að sveigja til og sýna sveigjanleika í rekstri stofnananna? Verður það dýrara og erfiðara, eins og við höfum margoft talað um hér í þessum þingsal, að snúa við stóru skipi eins og ríkisstofnun, verður það hugsanlega erfiðara? Einnig vil ég spyrja hv. þingmann um viðhorf hennar til tillögu sem við höfum lagt fram nokkrum sinnum í Miðflokknum undir forystu hv. þm. Bergþórs Ólasonar um að það væri hægt að taka á þessum vanda með þeim hætti að greiðendur útvarpsgjalds geti valið hvert sú greiðsla rennur, til hvaða fjölmiðils, hvort hún styðji það frumvarp.