endurskoðun á rekstrarumhverfi fjölmiðla Frú forseti. Ég ætla einnig að taka fram hér í mínu fyrra andsvari hversu ítarlegt og vandað þetta frumvarp er af hálfu flutningsmanna þess og hrósa þeim fyrir það. Það kom mér á óvart í ræðu hv. þingmanns þegar hún nefndi að launagreiðslur RÚV væru hærri en launagreiðslur í dómskerfinu. Það kemur mjög á óvart og undirstrikar raunverulega að það þarf auðvitað að taka á þessu. Þarna er útvarp í ríkiseigu, útvarpsstöð sem er á einhvers konar sjálfvirkri útþensluleið. Þarna er verið að leggja bönd á starfsemi RÚV að mörgu leyti, bæði hvað varðar kostun og auglýsingar o.fl. og einnig á umfang stöðvarinnar, þ.e. verið er að takmarka hve margar rásir RÚV geti haldið úti. Og þess vegna spyr ég um t.d. það sem RÚV hefur verið að gera að undanförnu, að halda úti ýmsum hlaðvörpum og samfélagsmiðlum og eitthvað svoleiðis: Er í frumvarpinu er gert ráð fyrir að það verði lögð bönd á það einnig?