endurskoðun á rekstrarumhverfi fjölmiðla Frú forseti. Í fyrsta lagi finnst mér vont að heyra að fulltrúi stjórnarmeirihlutans fullyrði það svo gott sem að með meiri aðkomu pólitíkurinnar að ramma í kringum eina opinbera stofnun sem gerir mýmargt annað en að flytja fréttir, að þar með verði höfð pólitísk afskipti af þeirri stofnun. Ég segi bara: Margur heldur mig sig, frú forseti, og þetta var vont að heyra. Það eru engin minni pólitísk afskipti sem við erum að leggja til hér í þessu frumvarpi en hægt væri að hafa í dag. Það fer bara eftir því hver heldur á því valdi hverju sinni og ég hef reynt að temja mér að líta á þetta í mikilli armslengd frá pólitíkinni. Þær dylgjur sem eru lagðar á borð eftir að ég hef fært, held ég, frekar ágæt rök fyrir því að hér verði að sníða annan ramma í kringum fjölmiðlamál á Íslandi er það smættað niður í að Ríkisútvarpið hafi, hvað, flutt einhverjar fréttir af einhverjum hneykslismálum? Ég frábið mér þennan málflutning. Hann er fyrir neðan allar hellur. Og ég minni hv. þingmann á að það voru reyndar þingmenn í hans hv. stjórnarmeirihluta sem sögðu upphátt að það væru ákveðnir fjölmiðlar sem ættu ekki að fá opinbert fé vegna þess að þeim hugnaðist ekki fréttaflutningur af þeirra hneykslismálum. Heyr, heyr. Forseti minnir aftur á ræðutímann.