leit að olíu og gasi Virðulegur forseti. Ég þakka hv. framsögumanni þessa máls og formanni Miðflokksins fyrir góða yfirferð á þessu mikilvæga máli sem maður myndi nú vilja óska að væri ekki síður metnaðarmál hjá sitjandi ríkisstjórn. En úr því að því er ekki að heilsa þá skirrumst við ekki við að standa vaktina á þessu sviði og benda á þennan afar athyglisverða valkost fyrir Ísland til að fjölga tækifærum Íslendinga á sviði atvinnulífs, á sviði framsækinnar úrvinnslu náttúruauðlinda eins og við erum nú þegar víðfræg fyrir um allan heim, að vera hér með mjög trausta og eftirsóknarverða stöðu í endurnýjanlegum orkugjöfum. Eins og ég hef sagt áður í umfjöllun um þetta tiltekna mál þá held ég að út frá umhverfissjónarmiðinu sé ekki hætt við því að það verði ekki áfram sérstaða okkar Íslendinga, á sviði endurnýjanlegra orqkugjafa. Þar höfum við verið á þessari liðnu öld frá fullveldisstofnun og raunar alla 20. öldina með sérstaka stöðu, öfunduð á veraldarvísu fyrir þá sérstöðu. En þetta væri mjög traust og góð viðbót við það hvernig við Íslendingar nýtum náttúruauðlindir á ábyrgan hátt til hagsbóta fyrir allan almenning í landinu. Ég rifja það upp í þessu sambandi þegar við berum þetta á borð hversu fálega var tekið í þetta af hálfu sitjandi ríkisstjórnar hér síðasta haust þegar þetta kom til umræðu og harma að ég heyri varla annað á tóninum hjá hæstv. ríkisstjórn en að mótstaða þeirra hafi heldur harðnað en hitt, að menn séu sífellt opnari fyrir þessu tækifæri sem ætti þó að vera. Þá var gefið til kynna að það væru engin sérstök gögn sem gæfu til kynna vinnanlega olíu á þessu svæði sem hér er vísað til, sem er auðvitað ekki rétt. Þar fyrir utan hef ég svo sem reynt að halda því á lofti að það sé ekki endilega hlutverk hæstv. ráðherra að taka endanlega afstöðu af eða á um það hvort hann telji að vinnanleg olía finnist á þessu svæði, þetta væri mun heldur í höndum viðeigandi aðila, viðeigandi fyrirtækja eða félaga sem færu í þessa vegferð að skera úr um það. Við getum vart gert það héðan frá Reykjavík. Það á eftir að leita af sér allan grun, það er auðvitað kjarni málflutningsins, að láta leitarmenn í raun og veru skera úr um þetta. Það var vísað til annarra atriða, kostnaðar við stjórnsýslu, og stundum finnst mér líka bera á að það væri á einhvern hátt illt afspurnar fyrir Íslendinga að standa í þessum rekstri. Ég tel það alls ekki vera. Ég held að það væri gott afspurnar fyrir okkur Íslendinga sem fullvalda þjóð sem er tilbúin til þess að nýta þau tækifæri sem okkur gefast, að kanna alla vega þessa möguleika til hlítar. Ekki fæ ég séð að Norðmenn liggi alþjóðlega undir ámæli fyrir að nýta olíu eins og þeir gera, mun heldur eru þeir aftur öfundaðir af öðrum þjóðum heims fyrir þá vel heppnuðu nálgun sem þeir hafa viðhaft í þessum efnum í gegnum tíðina sem hefur borið mjög ríkulegan ávöxt fyrir þá, auðvitað í fjármunum talið en auðvitað líka bara í víðari skilningi að geta reitt sig á þessa sjóði sem af þessu hljótast. Engu að síður tekur maður það auðvitað fram að hér er enginn að lofa nokkrum sköpuðum hlut með þessari umræðu. Auðvitað eru menn meðvitaðir um að þetta er alltaf spurning um að það þarf að finna rétta æð til að geta raunverulega farið af stað í að sækja þessi verðmæti. En ef möguleikinn er fyrir hendi þá er það mitt eindregna mat, virðulegur forseti, að við ættum að nýta það. Þess vegna fagna ég því að þetta mál sé fram komið enn á ný og kalla að sjálfsögðu eftir því að þeir sem hér leynast á Alþingi fylki sér að baki þessum málstað vegna þess að þetta er mikið hagsmunamál fyrir sannarlega auðvitað kjördæmið sem hér er undir, Norðausturkjördæmi, en alls ekki eitthvað sem einskorðast við það heldur landið allt og framtíðarkynslóðir hérna á Íslandi, að fjölga stoðum undir efnahagslífið. Það er ekki vanþörf á því á þessum síðustu og verstu tímum að við horfum svolítið til framtíðar með það nú þegar stór önnur viðfangsefni eru frá í pólitísku umræðunni, að við getum farið að beina kröftum okkar að því einmitt hvar tækifæri okkar Íslendinga liggja til framtíðar og þá er gott að við í Miðflokknum erum alla vega, eins og í öllum öðrum málum, jafn víðsýnir og raun ber vitni. Að því sögðu lýk ég máli mínu en þakka enn og aftur fyrir að þetta góða mál sé flutt, tækifærismál fyrir íslenska þjóð.