skortur á dýralæknum og starfsskilyrði þeirra Frú forseti. Mig langar að eiga orðastað við hæstv. atvinnuvegaráðherra er kemur að starfsskilyrðum dýralækna. Það er engin ný saga hvað það varðar að það hefur verið skortur á dýralæknum vítt og breitt um landið. Það einskorðast ekki bara við hinar dreifðu byggðir, þetta á sömuleiðis við um höfuðborgarsvæðið þegar kemur að hinni svokölluðu stórdýravakt. Í sumar sérstaklega held ég að steininn hafi tekið alveg úr hvað það varðar. Á þetta hefur verið bent undanfarið og sömuleiðis hafa dýralæknar og forystumenn dýralækna bent á að heildurendurskoðun á starfsskilyrðum dýralækna sé mjög mikilvæg. Það er ábyrgðarhluti að halda dýr. Það eru sömuleiðis miklar byrðar lagðar á dýralækna í hinum dreifðu byggðum. Við skulum segja að þeir séu kannski með einn fjórða af landinu undir þegar kemur að því að þjónusta dýr. Við þekkjum það sömuleiðis að t.d. á Austurlandi hefur verið starfandi dýralæknir á Suðurfjörðum, sem ætlaði að vísu að vera löngu hættur vegna aldurs en hefur ekki getað hætt, og sá dýralæknir hefur verið að þjónusta frá Egilsstöðum og alveg niður á Höfn í Hornafirði. Svona getum við talið áfram, þetta á við sömuleiðis um Vestfirði og fleiri svæði. Því beini ég spurningu, frú forseti, til hæstv. atvinnuvegaráðherra: Er heildarendurskoðun á vaktkerfi og starfsskilyrðum dýralækna til skoðunar í hennar ráðuneyti eða undirstofnunum ráðherra, þ.e. Matvælastofnun, sem heitir væntanlega núna Stofnun atvinnuveganna? Þetta er gríðarlega mikilvægt atriði upp á það að ná því fram sem við viljum þegar kemur að velferð dýra.