útlendingar Frú forseti. Ég vil byrja á því að þakka hæstv. dómsmálaráðherra fyrir framsögu sína í þessu máli. Það er mjög mikilvægt að lagaumgjörð um þennan viðkvæma og mikilvæga málaflokk sé sambærileg því sem gerist á Norðurlöndunum og innan Schengen-samstarfsins. Ég hef áhuga á því að ræða við hv. þingmann örlítið um flóttamannanefndina og breytingar á 9. gr. laganna því að það vakti athygli mína að ríkisstjórnin hafi á síðasta ári tekið ákvörðun um að dómsmálaráðuneytið færi hér eftir með flóttamannanefndina, en það er auðvitað lögbundið að það er sá ráðherra sem fer með félagsmál sem gegnir því hlutverki. Hér er sem sagt verið með, mætti skilja, afturvirkum hætti að breyta lögunum í samræmi við þennan vilja ríkisstjórnarinnar og ég hef áhuga á að fá skýringar ráðherrans á þessu.