útlendingar Virðulegi forseti. Aftur verð ég að árétta við þingmanninn að til að þessi breyting geti gengið í gegn þarf Alþingi að breyta lögum. Það er alveg skýrt um þetta frumvarp eins og öll önnur. Það er auðvitað þannig með greiðslu bóta að þær eiga að meginstefnu að fara í gegnum félagsmálaráðuneytið og að einhverju marki í gegnum heilbrigðisráðuneytið og ég benti á þetta hér í þingsal um daginn þegar ég var til svara um þessa þætti. Síðan tvinnast málin auðvitað saman, eins og það hvort menn sjái það sem lið í útlendingamálum hvernig þessar byrðar skiptast milli sveitarfélaga. Maður sér þá mynd nefnilega teiknast upp býsna skýrt að fyrir lítil og fámenn sveitarfélög skiptir engu máli hvort við erum að ræða málefni fatlaðra barna eða atvinnuþátttöku og þessi mál sem þingmaðurinn er að vísa til hafa auðvitað meiri áhrif á fámennari sveitarfélög. En öll erindi sem varða félagsmálaráðuneytið fara áfram til félagsmálaráðuneytisins þar til málefni flóttamannanefndar hafa flust annað með lögum frá Alþingi.