útlendingar Frú forseti. Ég þakka hæstv. dómsmálaráðherra fyrir að leggja fram frumvarpið og útskýra það hérna fyrir okkur og vil auðvitað bara taka fram að mér þykir mjög mikilvægt að við sýnum áfram stuðning í verki við Úkraínu og það fólk sem á um sárt að binda vegna stríðsins. Þó að það sé ekki mikill tími hér til að fara út í stóru drættina þá er það kannski í samræmi við það hvernig þetta flóttamannakerfi okkar ætti að virka, þ.e. við förum og mætum þeim sem eru í neyð en ættum að draga úr því að vera hér að reka þetta stóra umfangsmikla kerfi sem tekur á móti hverjum sem hingað vill koma og sækja um hæli. Mig langaði aðeins að forvitnast hjá hæstv. ráðherra, af því að eins og hefur komið fram þá eru hingað búnir að streyma Úkraínumenn frá væntanlega árinu 2022 í kringum þetta mál. Þetta er orðið yfir fjögurra ára tímabil sem við erum að fara að lengja og ég held, ég sá það einhvers staðar, að heildarfjöldi verndar sem hefur verið veitt á grundvelli þessa úrræðis sé eitthvað í kringum 7.000. Það væri fróðlegt að fá frá ráðherranum hvað sé til af gögnum um þennan hóp og hvernig honum hafi vegnað hér. Er fólk að sækja í að leita sér að störfum hér eða námi? Það væri gagnlegt að heyra aðeins hvernig ráðherrann sér stöðu þessa hóps.