útlendingar Frú forseti. Ég þakka hæstv. ráðherra fyrir umfjöllunina. Hér er, að því er virðist, og það er kannski það sem ég myndi í fyrri fyrirspurn vilja fá staðfest frá hæstv. ráðherra, ekki verið að breyta neinu svo heitið geti í sambandi við Úkraínumenn, þ.e. þetta er í raun og veru engin breyting, bara framlenging á þeirri umgjörð sem verið hefur í samræmi við það að aðrar þjóðir eru að framlengja þetta um þetta ár. Það er verið að ýta þessu á undan sér í einhverjum skilningi vegna þess að menn vildu náttúrlega ekki að þetta félli niður þannig að menn færu þá í það að sækja beint um vernd hjá Útlendingastofnun, þ.e. einstaklingsbundið. Ég myndi vilja fá það staðfest frá hæstv. ráðherra að í þessu felist í raun og veru ekki breyting nema bara það sem hefur komið fram. Það er ekki verið að breyta því hversu mikill aðgangur er hérna fyrir Úkraínumennina. Svo, ef mér gefst tími hér í síðari andsvörum, vildi ég ræða um — en ég byrja á þessari spurningu.