útlendingar Virðulegur forseti. Ég þakka hæstv. ráðherra fyrir svarið. Ég hefði áhuga á að vita: Vegna þess að það er talað um hver afdrif þessa hóps verða eftir að þessari tímabundnu vernd lýkur í þessum tilmælum frá Evrópusambandinu sem verið er að vísa til í frumvarpinu þá finnst mér það heldur hljóma þannig að menn séu að horfa til þess með hvaða hætti menn geta veitt t.d. ótímabundið dvalarleyfi á árinu og önnur dvalarleyfi eftir að þetta fellur niður, eftir að menn hætta að hafa þessa opnu vernd. Ég hefði áhuga á að heyra hver framtíðarsýn hæstv. ráðherra er fyrir þennan hóp í víðari skilningi. Verður hann allur hérna eftir eða mun hann fara aftur heim? Það er kannski erfitt að segja til um það en menn geta haft ákveðna sýn. Síðan er það í sambandi við Úkraínumenn kannski í víðari skilningi, hvort engin takmörk séu sett fyrir því eða hvort það standi ekki til að skoða frá hvaða svæðum í Úkraínu menn eru að koma. Þetta hefur verið til umræðu, að það er auðvitað ólíkt ástand eftir héruðum og eftir svæðum. En eins og ég skil það þá hefur ekki verið gerð nein krafa um að fólk sé frá einu eða öðru svæði hingað til hérna á Íslandi. Hvort eitthvað slíkt sé til skoðunar og hvort menn hafi gögn um það hvaðan fólk er að koma hérna til Íslands, frá hvaða svæði í Úkraínu.