útlendingar Virðulegur forseti. Ég vil byrja á að þakka hæstv. dómsmálaráðherra fyrir yfirferðina og svörin hér í fyrri andsvörum. En það sem mig langar aðeins að eiga orðastað við hæstv. dómsmálaráðherra um — af því að hér hefur komið fram að það sé engin breyting, þetta séu fimm eða sex ár. Ef maður les frumvarpið og les til dæmis um tilefni og nauðsyn lagasetningar kemur fram að 20. ágúst var gerð reglugerðarbreyting er varðar einstaklinga sem sæta takmörkunum á brottför frá Úkraínu vegna herskyldu. Já. Já, ég veit, það stendur hér. En spurning mín er í raun og veru þessi: Er þetta ekki gríðarlega stór breyting? Virðulegur forseti. Mér finnst þetta vera siðferðislega risastórt mál. Og er þetta ekki eitthvað sem hefði átt erindi inn í frumvarpið sem lagabreyting í staðinn fyrir að hæstv. ráðherra og ráðuneytið taki þetta eitt og sér upp í reglugerðarheimild? Af því að við erum nú hér að ræða þetta frumvarp spyr ég hvort ekki hefði verið skynsamlegra að nota ferðina og setja þetta inn í lögin þannig að Alþingi Íslendinga hefði getað tekið umræðu um þetta stóra mál, sem það er að mínu viti.