útlendingar Virðulegur forseti. Mig langaði aðeins að fá fram sjónarmið hv. þingmanns t.d. á því sem hann nefndi í lok ræðu sinnar og varðar mikilvægi þess að íslenskar reglur séu í samræmi við, eins og hann nefndi það, reglurnar í kringum okkur. Hann nefndi Evrópusambandið sérstaklega og Noreg. Menn hafa oft nefnt Norðurlöndin í þessu sambandi en nú liggur það fyrir að meira að segja á Norðurlöndunum eru reglurnar nokkuð mismunandi. Þær eru t.d. mjög mismunandi á milli Svíþjóðar og Noregs og Danmerkur. Eitt sem mér fyndist nú hafa þurft að koma fram í ræðu hæstv. ráðherra er einmitt reifun á þessum reglum og sérstaklega þeim breytingum sem hafa t.d. átt sér stað á löggjöfinni í Noregi, þar sem Noregur tók nú fyrir a.m.k. ári síðan upp þá reglu að það væri heimilt að synja um alþjóðlega vernd ef umsækjandi væri fjarri átakasvæðum í Úkraínu. Ég hygg að sú regla hafi komið til eftir dóm hæstaréttar Noregs varðandi þetta þannig að þeir hafa fyrir löngu tekið upp einstaklingsbundna meðferð á umsóknum frá Úkraínu. Síðan í maí er það svo í Noregi að karlmenn á aldrinum 18–60 ára fá bara alls ekki neina tímabundna vernd á grundvelli fjöldaflótta. Í Danmörku eru reglurnar sambærilegar en þess utan er í Danmörku líka heimilt að afturkalla vernd þeirra sem eru á aldrinum 18–60 ára. Danir hafa þá reglu núna. Þannig að ég hlýt að spyrja hv. þingmann til hvaða átta hann vill líta í þessu sambandi þegar hann segir að íslenskar reglur þurfi að vera í samræmi við einhverjar reglur annarra ríkja. Eða kann að vera að Ísland eigi bara að setja sínar reglur með tilliti til hagsmuna Íslands á hverjum tíma?