útlendingar Frú forseti. Ég þakka hv. þingmanni fyrir andsvarið. Þetta eru auðvitað risastórar spurningar hvað varðar heimildir ráðherrans. Ég ætla ekkert að fjölyrða eitthvað um lögmæti þeirra. Allt eru þetta atriði sem þarf að skoða í allsherjar- og menntamálanefnd en ég hygg að upplegg ráðuneytisins sé það að 44. gr. sé heimildarákvæði til handa ráðherra til að ákveða sérreglur til hagræðingar eða flýtimeðferðar hvað viðkemur fjöldaflótta og á þeim grundvelli geti ráðherrann þrengt eigið vald að einhverju leyti. Eftir sem áður standa, hefði ég haldið, allar aðrar reglur laganna er varða alþjóðlega vernd á grundvelli einstaklingsbundins mats. En þetta er bara eitthvað sem við erum að ræða hér í 1. umræðu. Þetta er lagalega flókið og siðferðilega alveg ákaflega erfitt. Eins og kom fram í máli hv. þingmanns má svo sem alveg augljóst vera að þetta atriði er herskylduna varðar er auðvitað komið að beiðni úkraínskra stjórnvalda sem eru í þeirri hræðilegu stöðu að vera að manna framlínur í ógeðslegum stríðsátökum og þurfa því að beita þessu herskylduákvæði. Það er verið að stoppa í gatið hvað þetta varðar. En allt eru þetta auðvitað atriði sem verða skoðuð ítarlega í allsherjar- og menntamálanefnd og ég hlakka bara til þeirrar athugunar.