útlendingar Frú forseti. Ég þakka hv. þm. Sigríði Á. Andersen fyrir hennar andsvar. Ég held að þeir séu á sjöunda þúsund eða rúmlega 6.000 Úkraínumenn sem hafa komið hingað á grundvelli þessa fjöldaflótta svokallaða, sem er tiltekið úrræði við tilteknar aðstæður. Í fyrsta lagi vil ég nefna að ég hygg að þeir sem hingað hafa leitað á þessum grundvelli hafi hug á því að fara til baka til síns heimalands, a.m.k. þegar þeir komu hingað fyrst. Ég held að ég geti sagt, eins og ég held að það hafi komið fram í ræðu hv. þingmanns áðan, að kannski hefði mátt endinn skoða í upphafi. Ég held að enginn hafi búist við svona löngu stríði þegar Rússland réðst inn í Úkraínu heldur hafi Evrópa, og þar með talið við, brugðist við og tekið á móti Úkraínufólki sem flúði þaðan vegna stríðsins. Ég held í fyrsta lagi að Úkraínufólk vilji fara til baka. Í öðru lagi held ég að sjálfsögðu að úkraínsk yfirvöld vilji fá fólkið sitt til baka, hvort tveggja frá Íslandi og öðrum löndum sem það hefur leitað til. Ég hef trú á því að jafnvel þó svo að einhverjir muni áreiðanlega á grundvelli annarra úrræða en að fá mannúðarleyfi, á grundvelli fjöldaflóttans, óska hér eftir ótímabundnu dvalarleyfi. Ég hygg að það verði alveg klárlega einhver fjöldi Úkraínufólks sem gerir það. Ég vísaði til þess í ræðu minni að það hefði komið töluvert af umsögnum frá Úkraínufólki, það var meðan málið var í samráðsgátt, það var ekki svo mikið við meðferð málsins á þingi í fyrra. En það var fólk sem hafði áhyggjur af stöðu sinni. Þetta voru á þriðja hundrað umsagnir, alls ekki 6.000 eða þess háttar, þannig að á þessum tímapunkti ætla ég ekki að hafa miklar áhyggjur af þessu.