útlendingar Frú forseti. Ég þakka hv. þm. Sigríði Á. Andersen fyrir hennar síðara andsvar. Þessi umræða er, eins og hv. þingmaður sagði, siðferðisleg og þar af leiðandi erfið. En svo ég taki af allan vafa um það þá nefndi ég ekki hermenn heldur var að vísa til þess fólks sem hér væri þegar þessu fjöldaflóttaleyfi lýkur í mars 2028. Þá getur það sótt um á grundvelli tengsla við landið, atvinnu eða náms. Hins vegar varðandi þá einstaklinga sem hingað myndu leita á næstu misserum, karlmenn sem ekki hafa lokið herskyldu eða sinni borgaralegu skyldu í Úkraínu, sé ég ekki í fljótu bragði að þeir falli undir önnur ákvæði laganna um að fá hér alþjóðlega vernd. Ég ætla auðvitað ekki að útiloka það, en það væri þá klárt að það væri í andstöðu við þessa breytingu sem var gerð um að þeir sem ekki hefðu staðið skil á sinni borgaralegu skyldu í Úkraínu gætu ekki fengið hér alþjóðlega vernd á grundvelli fjöldaflótta — að þeim yrði þá veitt alþjóðleg vernd á grundvelli annarra þátta, ég sé það ekki fyrir mér. Hins vegar er þetta, eins og hv. þm. Sigurður Örn Hilmarsson sagði hér áðan, auðvitað afskaplega erfið spurning, erfið umræða og jafnvel þótt maður taki enga afstöðu til þess hvort ekki hefði verið eðlilegra að hafa þetta í lögunum eða í reglum ráðherrans þá er þetta siðferðileg spurning. En ég held að það sé alveg ljóst, jafnvel þótt það sé kaldranalegt, að ef við værum með öðruvísi reglur en nágrannalöndin þá myndi sækja hingað fólk sem myndi fá neikvætt svar í okkar nágrannalöndum.