Störf þingsins Virðulegi forseti. Mig langar að ræða hér í dag um hallalausu fjárlögin sem voru lögð fram núna fyrir skemmstu og hvernig þau birtast börnum og barnafjölskyldum. Ég er þriggja barna móðir og jafnframt amma, hvort sem þið trúið því eða ekki, en málefni barna standa mér mjög nærri og jafnframt líka flokknum mínum, Viðreisn, sem hefur alltaf sett málefni barna mjög ofarlega. Mig langar að varpa ljósi á helstu áherslur sem um ræðir í fjárlögunum. Við erum að stytta bið barnanna okkar eftir nauðsynlegri þjónustu. Við erum að setja 350 millj. kr. í að stytta biðlista eftir þjónustu við börn. Við erum að setja fjármagn til fjölskylduteymis Geðheilsumiðstöðvar barna. Við erum að grípa börnin okkar með fjölþættan vanda. Við erum að setja 800 millj. kr. í sérhæfða þjónustu fyrir börn sem eru vistuð utan heimilis eða börn með fjölþættan vanda. Við höldum áfram að styðja börnin okkar sem þurfa stuðning. Við erum að setja 1 milljarð til Barna- og fjölskyldustofu og 400 millj. kr. til barna í viðkvæmri stöðu. Við erum að passa betur upp á börnin okkar af erlendum uppruna og við erum að setja aukið fjármagn til að styðja börnin í skólakerfinu, um 400 millj. kr. Við erum loksins að setja fjármagn í að semja nýtt námsefni fyrir grunnskóla. Við erum að setja 380 millj. kr. aukalega í námsgagnagerð og við erum að leggja áherslu á læsi, lestur og STEM-greinar í takt við atvinnustefnu stjórnvalda. Við erum að setja 8,8 milljarða í mál sem snúa að börnum og barnafjölskyldum; 8,8 milljarða í innspýtingu í málefni barna og við erum samt að spara til að hætta að reka ríkið á yfirdrætti.