framkvæmdaáætlun í málefnum innflytjenda fyrir árin 2026--2029 Frú forseti. Ég þakka hv. þingmanni fyrir ræðuna. Mig langar aðeins að koma inn á þetta varðandi styrkinn í fjölbreytninni. Hv. þingmaður heldur því fram að það sé ekki rétt efnislega að einhver styrkur sé í fjölbreytni. Aftur á móti hefur sú sem hér stendur lesið um það í fleiri en einu fræðiriti að það sé reyndar þannig samkvæmt rannsóknum á ákvarðanatöku o.s.frv. að fjölbreyttir hópar taki almennt betri ákvarðanir. Auðvitað er þetta í víðum skilningi en hefur verið töluvert rannsakað og þetta er eitthvað sem fólk lærir bara á fyrstu önn í háskóla í mörgum félagsgreinum, sálfræði o.s.frv. Mig langaði að spyrja, þetta er svona fyrsta spurningin, hvað hv. þingmaður hefur fyrir sér í því að segja að þetta sé rangt. Ég held að það sé ekki rétt en það verður áhugavert að heyra um hvað hv. þingmaður er að tala þegar hann heldur þessu fram. Svo varðandi glæpatíðnina, af því að hv. þingmaður kom inn á það í andsvari sínu við hæstv. ráðherra hér áðan og spurði hæstv. ráðherra, þegar við vorum að ræða aðgerðaáætlun um málefni innflytjenda, hvort það væri fyrirhugað að vera með mælaborð um glæpatíðni. Mig langar að spyrja í þessu sambandi og í samhengi við aðgerðaáætlunina: Sér hv. þingmaður ekki neitt jákvætt við þær aðgerðir sem eru listaðar upp og hafnar hv. þingmaður alfarið öllum aðgerðum sem eiga að stuðla að aukinni inngildingu og að fólk geti tekið þátt í samfélaginu?