framkvæmdaáætlun í málefnum innflytjenda fyrir árin 2026--2029 Frú forseti. Það er auðvitað auðvelt að hunsa niðurstöður einhverra rannsókna vegna þess að maður heldur því fram að rannsakendur séu vinstrisinnaðir, án þess að vita nokkuð um það. En allt í lagi, við getum skipst á þessum rannsóknum, ég og hv. þingmaður, og þetta er auðvitað hluti af einhverri stærri umræðu. En ef maður heldur því fram að eitthvað sé beinlínis rangt þá finnst mér eðlilegt að þurfa að rökstyðja það með einhverjum hætti og hv. þingmaður rökstyður það með sinni upplifun og vitnar til einhvers hugsanlegs um einsleit samfélög og það er áhugaverður punktur. Varðandi spurninguna til mín þá getur hv. þingmaður spurt mig þegar ég held ræðu. Þessi liður er ekki gerður til þess, að mér skilst. En ég vil aftur spyrja hv. þingmann, af því að nú erum við að ræða aðgerðaáætlun um málefni innflytjenda sem ég tel til bóta — og það er mín sannfæring að samfélagið geti svo sannarlega grætt á því að vera hér með innflytjendur, að við getum öll grætt á því og að þeir sem hingað koma fái tækifæri til að aðlagast samfélaginu. Það er mín afstaða að það sé líka hlutverk stjórnvalda að auðvelda það. Við höfum hér í þessum þingsal rætt önnur lönd eins og t.d. Danmörku þar sem er beinlínis miðstöð þar sem innflytjendur koma og það er lagt mikið upp úr því að vera t.d. með ókeypis tungumálakennslu, auðvelda aðgengi að samfélaginu með þeim hætti. Og mig langar því aftur að spyrja þingmanninn: Leggst hann gegn þessum aðgerðum? Leggst hv. þingmaður gegn aðgerðaáætluninni eða aðgerðunum hér undir, t.d. því að auka aðgengi að íslenskunámi, bæta mat á erlendri menntun og starfsreynslu, auka þátttöku barna og ungmenna í íþrótta-, æskulýðs- og tómstundastarfi, efla geðheilbrigðisþjónustu við flóttafólk? Leggst hv. þingmaður gegn þessu?