framkvæmdaáætlun í málefnum innflytjenda fyrir árin 2026--2029 Virðulegi forseti. Já, ég held að það gerist nú oft í þessari umræðu að maður sé kannski að einhverju leyti sammála jafnaðarmönnum um þessi mál. En það er nú líkt þeim að gera athugasemd við uppröðun umræðuefna á þessu sviði vegna þess að hún lýsir kannski ekki nógu vel góðmennsku þess sem talar þá stundina. En það er svo sem langvarandi vandamál í pólitíkinni. Ég held að ég og hv. þingmaður séum að mörgu leyti, ef maður færi yfir þennan málaflokk, sammála um hvað eina í þessu, þótt mér þyki hv. þingmaður ekki kannski alveg hafa svarað skýrt um það hvort hún styðji mælaborð um fjölda afbrota eftir upprunalandi. Það væri áhugavert að fá það já eða nei-svar frá hv. þingmanni, ef henni þóknast það. En að öðru leyti er hin spurningin og vangaveltan kannski bara mun frekar sú að ég er, eins og ég tók nú skýrt fram áðan, síst mótfallinn því að stjórnvöld hniki til ýmsu hjá sér til að stuðla eins og orðið getur að aðlögun innflytjenda að íslensku samfélagi. Ég tel hins vegar ekki nauðsynlegt að íslensk stjórnvöld gangi fram fyrir skjöldu með hugtök eins og inngildingu, sem mér hefur frekar þótt felast í því að íslenskt samfélag þurfi að laga sig að komumönnunum frekar en að komumennirnir lagi sig að íslensku samfélagi. Það er þessi greinarmunur sem ég geri á þessum hugmyndum um aðlögun og innflytjendur. Þar að auki tel ég varðandi fjöldann sem hingað hefur komið á síðustu árum, ef fram heldur sem horfir, ef slík þróun heldur áfram, að það sé algerlega ósjálfbært. Það er spurning hvort hv. þingmaður deili því mati, af því að eins og orðið getur held ég að menn séu almennt sammála um að t.d. börnum innflytjenda á að vera kennd íslenska í skólakerfinu. Hins vegar er alltaf spurning um það hvernig við horfum á stefnuna til framtíðar og hvort við teljum raunhæft að ná þessum markmiðum, t.d. um íslenskukennslu og annað, þegar fjöldinn er eins og hann hefur verið, vegna þess að því miður hefur þetta einfaldlega alls ekki reynst raunhæft markmið að neinu leyti ef þú horfir á niðurstöðuna.