ástæða afsagnar mennta- og barnamálaráðherra Virðulegi forseti. Það er fátt farið að koma mér á óvart þegar kemur að Flokki fólksins. Í frétt hjá Ríkisútvarpinu kemur loksins skýrt fram hvað varð til þess að þáverandi hæstv. menntamálaráðherra, Guðmundur Ingi Kristinsson, sagði af sér sem ráðherra. Hvernig hæstv. ráðherra stýrir sínum flokki og ræður og rekur þingmenn og ráðherra eins og henni einni sýnist kemur í raun engum við og ekki ætla ég að hafa skoðanir á því. Það sem verður samt að draga fram í sviðsljósið eru afskræmingarnar og blekkingaleikurinn sem ráðherrar þessarar ríkisstjórnar hafa boðið upp á þegar gengið er á eftir svörum í þessu máli og auðvitað fleirum. Nú er það skjalfest í skilaboði fyrrverandi aðstoðarmanns, sem er jafnframt eiginkona hæstv. félags- og húsnæðismálaráðherra, að það voru valkyrjurnar sem ráku hv. þingmann og fyrrverandi ráðherra. Honum var hótað stríði ef hann myndi ekki hlýða og hann fékk ekki einu sinni að rita uppsagnarbréfið sjálfur. En hver hafa svör valkyrjanna verið? Hæstv. ráðherra, Inga Sæland, fullyrti í sjónvarpi allra landsmanna að þetta væri upplifun en ekki sannleikur. Hæstv. ráðherra, Ragnar Þór Ingólfsson, bætti við að honum þættu orð þingmannsins ekki svaraverð. Fyrst var það styrkjamálið, svo var skólastjóra hótað lögreglunni, fjölmiðlar sviptir styrkjum, annar menntamálaráðherra þurfti að segja af sér o.s.frv. Aldrei er gengist við einu né neinu en núna liggur þetta skýrt fyrir. Hvernig svarar hæstv. ráðherra fyrir þetta nú þegar allar upplýsingar eru uppi á borðum? Er þetta enn þá bara upplifun þingmannsins? Vill ráðherra biðja þingmanninn eða þjóðina afsökunar á að hafa sagt ósatt í beinni útsendingu? Í þessu húsi þarf að ríkja traust og trúverðugleiki, sér í lagi hjá ráðherrum í ríkisstjórn Íslands. Ég vitna í Kristrúnu Frostadóttur, hæstv. forsætisráðherra: „Það er bannað að plata í þessu starfi.“ Nú geri ég kröfu um svör frá hæstv. ráðherra og ég vil minna hana á að í þessu ræðupúlti er okkur skylt að segja sannleikann í samræmi við drengskaparheit sem við undirrituðum við stjórnarskrá Íslands. Forseti biður hv. þingmenn að virða ræðutímann.