ástæða afsagnar mennta- og barnamálaráðherra Virðulegi forseti. Ég skal vera hreinskilin fyrir hv. þm. Guðrúnu Hafsteinsdóttur sem hefur geð í sér til að koma fram með þeim hætti sem hún gerir hér í hinu háttvirta ræðupúlti Alþingis. Ráðherrastarfi fylgir mikil ábyrgð og mikið álag. Við störfum í umboði þjóðarinnar og okkur ber að tryggja að þau mikilvægu verkefni sem okkur eru falin nái fram að ganga. Ég tek þá ábyrgð alvarlega, líka þegar taka þarf erfiðar ákvarðanir. Það er ljóst að okkur Guðmund Inga greinir á um aðdraganda og ástæður þeirra breytinga sem urðu. Ég kannast ekki við þá mynd sem hefur verið dregin þar upp. Um leið og hann fór í veikindaleyfi gegndi ég embætti mennta- og barnamálaráðherra fyrir hann um tíma. Þegar mér varð ljóst í hversu stóra aðgerð Guðmundur Ingi fór þá lá það ljóst fyrir að mennta- og barnamálaráðuneytið gæti ekki svo vikum og jafnvel mánuðum skipti verið án öruggrar forystu. Það eru því fleiri en ein hlið á þessu máli en ég tel ekki rétt að ræða persónuleg málefni hans eða heilsufar frekar á opnum vettvangi. Guðmundur Ingi, háttvirtur, getur séð um það. Ég ætla ekki að gera það. Sá sem glímir við veikindi á að fá svigrúm til að sinna bata sínum í friði, enda sagði hv. þingmaður það ítrekað að hann myndi setja heilsuna í fyrsta sæti. Mér þykir leitt að samskiptin hafi þróast með þessum hætti. Ég ber ábyrgð á mínum ákvörðunum og ég stend við þær. Um leið virði ég að Guðmundur upplifði málið með öðrum hætti en ég. Ég þakka Guðmundi fyrir samstarfið og óska honum og fjölskyldu hans alls hins besta. Forseti minnir á að ávallt ber að nefna þingmenn með fullu nafni.