gjaldskrárhækkanir Frú forseti. Ég þakka hv. þingmanni fyrir fyrirspurnina og ég get tekið undir að það er alltaf erfitt þegar verið er að leggja gjöld á efnaminna fólk. En ég get upplýst að það er í skoðun núna að reyna að horfa meira til tekjutengingar að þessu leyti eins og víðs vegar annars staðar. Þegar verið er að tala um hækkanir eins og t.d. að ríkisstjórnin hefur boðað þessar gjaldskrárhækkanir um áramót og annað slíkt þá hefur þegar komið fram að það er ekki heilagur staður. Það er verið að skoða þessi mál enn betur og það kemur ekki í ljós fyrr en um áramótin hvernig það stendur raunverulega. Þegar við erum að tala um aldraða og öryrkja get ég staðið hér mjög stolt. Og það verð ég að segja að fyrrverandi flokksfélagi minn og minn besti samstarfsmaður þáverandi, hv. þm. Guðmundur Ingi Kristinsson, og ég börðumst fyrir því öll okkar ár í stjórnarandstöðu að tekjutengja kjör eldra fólks og öryrkja, almannatryggingaþega, við launavísitölu. Okkur tókst það fyrir páskana og munu þessir hópar fá gífurlega mikla kjarabót þann 1. janúar næstkomandi. Það hlýtur náttúrlega að skipta miklu máli. Við erum búin að hækka laun þeirra líka í öðru formi um tugi þúsunda króna frá því að Flokkur fólksins settist í þessa ríkisstjórn, þannig að það er borð fyrir báru frekar en ef þau hefðu setið eftir í umboði Miðflokks og Sjálfstæðisflokks og fengið að lepja dauðann áfram úr skel. Þannig að það má segja að plásturinn hafi verið rifinn af. Við fengum fólkið okkar til að takast á herðar erfiðar ákvarðanir sem myndu um leið lækna sárin og við sjáum bjartari framtíð fram undan. Við viljum síður vera að borga tæpan hálfan milljarð á dag í vexti. Við leggjum mikið kapp á að reyna að ná öllu réttum megin við núllið og hætta að reka ríkissjóð á yfirdrætti og þegar okkur hefur tekist það, hv. þingmaður, sem verður næsta á næsta ári, þá munum við sannarlega sjá bjartari tíma fram undan. En ég ætla að endurtaka það að þetta eru þjónustugjöld en ekki skattar sem eru gjöldin hjá sjúkraþjálfurum, svo það sé sagt.