árangur í orkuskiptum Virðulegur forseti. Ég er fegin að hæstv. umhverfis-, orku- og loftslagsráðherra er hér til svara úr því að hæstv. félags - og húsnæðismálaráðherra boðaði forföll í morgun vegna veikinda. Mig langaði þá að velta fyrir mér loftslagsmálum við hæstv. umhverfis-, orku- og loftslagsráðherra í kjölfar blaðamannafundar sem hann hélt nýlega um losun gróðurhúsalofttegunda. Þar kynnti hann einhverjar tölur í því sambandi. Hann rakti þar sérstaklega að 10 milljarðar hefðu runnið til bílaleiganna í landinu í formi styrkja, ýmist með beinum eða óbeinum hætti. Má þar nefna undanþágu frá virðisaukaskatti og einhverja afslætti og jafnvel svo beinar niðurgreiðslur til kaupa á bílum. Nú hefur komið í ljós að allir þessir styrkir og árangurinn af þessu hefur verið sá að útleiga á rafmagnsbílum hjá bílaleigum hefur farið úr 1% í rúmlega 2%, 2,5% held ég að það hafi verið. Svo má auðvitað nefna líka önnur útgjöld ríkissjóðs og skattgreiðenda sem nema tugum milljarða ef ekki 100 milljörðum kr. á undanförnum árum, í niðurgreiðslu eða einhverja styrki í þágu rafbílavæðingar. Mig langar að spyrja hæstv. ráðherra hvort honum finnist í ljósi þessa litla árangurs sem hefur náðst þarna hafa verið farið vel með fé skattgreiðenda. Hundruð milljarða hafa runnið í þetta og árangurinn er nánast enginn. Sérstaklega ber að hafa í huga að útblástur, losun gróðurhúsalofttegunda af vegasamgöngum, er ekki nema 8% af heildarlosuninni. Þá eru ekki meðtaldar flugsamgöngur. Og ef við tökum fjölskyldubílinn þá eru það 3% sem losun frá fjölskyldubílnum skilar. Er vel farið með peninga? Hefur það verið gert á undanförnum árum með yfir 100 milljarða kr. niðurgreiðslu í þennan málaflokk?