svör ráðherra í óundirbúnum fyrirspurnum Frú forseti. Ég ætla að hlýða fyrirmælum forseta og gera athugasemdir við fundarstjórn forseta. Það er að sjálfsögðu hlutverk forseta að benda á þegar ræðumenn fara yfir tíma, ávarpa ekki forseta eða ávarpa ekki þingmenn með fullu nafni. Það er líka hlutverk forseta að gera kröfu um það eftir sinni bestu getu að hér sé farið með satt og rétt mál og að ráðherrar sem sitja fyrir svörum komist ekki upp með að víkja sér undan því. Annað sem mig langar að nefna vegna ummæla hv. þm. Guðmundar Ara Sigurjónssonar er að við erum ekki hér, frú forseti, að tala um bara einhverja einstaklinga úti í bæ. Við erum að tala um fyrrverandi aðstoðarmann og það er heldur ekki rétt hjá hv. þingmanni að við séum hér að tala um einkaskilaboð, einkagögn. Þau eru það ekki lengur, þau eru í fréttunum, þau eru í Ríkisútvarpi allra landsmanna þannig að það er í hæsta máta eðlilegt, frú forseti, að vitnað sé til slíkra gagna.