svör ráðherra í óundirbúnum fyrirspurnum Virðulegi forseti. Við erum búin að upplifa það í allri tíð þessarar ríkisstjórnar að hér er spurningum aldrei svarað. Þeim er ekki svarað í óundirbúnum fyrirspurnum og það var engin nýbreytni hér í dag því að við erum búin að spyrja hæstv. mennta- og barnamálaráðherra hér ítrekað svara og höfum ekki fengið nein svör. Ég vil beina því til frú forseta að sjá til þess að hér svari ráðherrann spurningum. Því er nefnilega enn þá ósvarað hvort þetta mál hafi verið eitthvað sem fyrrverandi aðstoðarmaður fyrrverandi mennta- og barnamálaráðherra hafi bara tekið upp hjá sjálfum sér. Það finnst mér alvarlegt mál ef aðstoðarmenn ráðherra hér geta rekið ráðherra eða sett á þá þannig þvingu og hótað hér stríði. Ég ætla bara að óska eftir því að forseti stígi hér inn og við fáum sannleikann í því máli. Ef það er raunin þá er Alþingi Íslendinga komið á hættulegar brautir ef hér er fólk, aðstoðarmenn, sem getur beitt hér ráðherra þannig þvingunum, hótað stríði, ef þeir segja ekki af sér og svo tekur eiginmaður viðkomandi við embættinu fjórum dögum síðar.