svör ráðherra í óundirbúnum fyrirspurnum Virðulegur forseti. Þetta hefur verið nokkuð áhugaverð umræða hér undir fundarstjórn forseta og ég hvet virðulegan forseta til þess að skoða sérstaklega það sem þingflokksformaður Samfylkingar sagði í forsætisnefnd. Hér er sagt að það sé komið í fréttir Ríkisútvarpsins að það komi þinginu ekki við. Það sem er staðhæft með gögnum, sem, eftir því sem ég best veit, eru ekki fölsuð, er að valkyrjurnar, forystumenn í ríkisstjórn, hafi tekið ákvörðun um það að ráðherra á sjúkrabeði verði að hætta. Og hér kemur forystumaður Samfylkingarinnar fram og segir: Þetta er algerlega fyrir neðan allar hellur að þetta sé rætt hérna. Þetta er bara einkamál. Virðulegi forseti. Ég legg það til að forsætisnefnd fari yfir þetta því að ef það er þannig að almenningur eigi ekki rétt á þessum upplýsingum og svörum frá hæstv. ráðherrum þá þurfum við aldeilis að hreinsa til hérna. Þá getum við ekki verið að ræða öll þessi mál sem ég held að flestir telji að eigi erindi til almennings. Ég held að almenningur sé að velta fyrir sér: Af hverju eru forystumenn í ríkisstjórninni, valkyrjurnar, að taka þá ákvörðun að ráðherra á sjúkrabeði fái ekki lengur að vera ráðherra?