svör ráðherra í óundirbúnum fyrirspurnum Frú forseti. Hér undir liðnum fundarstjórn forseta komu fram ummæli af hálfu hv. þingflokksformanns Samfylkingarinnar þar sem látið var að því liggja að það væri eitthvað óeðlilegt við það að menn væru að ræða hér efni skilaboða sem komin eru fram í fjölmiðlum, fleiri en einum, nær öllum helstu fjölmiðlum, sem eru vissulega frá fyrrverandi aðstoðarmanni þáverandi hæstv. menntamálaráðherra. Ég vil einnig vekja athygli á því að ástæða þess að þau eru rædd hér sem viðeigandi efni í sambandi við hæstv. ríkisstjórn er að það er ljóst af þessum skilaboðum að þessi aðstoðarmaður virðist vera að flytja ráðherranum skilaboð ríkisstjórnarinnar. Það er ekki einhver skoðun eða einkaskoðun aðstoðarmannsins sem kemur þarna fram heldur er verið að flytja ráðherranum skilaboð frá ríkisstjórninni. Þannig hljóma þessi skilaboð. Ef menn geta borið það til baka þá er það sjálfsagt, en þannig kemur þetta okkur fyrir sjónir. Og eins og hv. þm. Sigmundur Davíð Gunnlaugsson bendir á þá er það eftir að hæstv. menntamálaráðherra hefur farið með rangfærslur í fjölmiðlum um efni þessara samskipta sem hv. þingmaður sér sig tilneyddan til að birta þessi samskipti. Þannig að ef einhver hérna er rangstæður þá er það hæstv. ríkisstjórn og hæstv. ríkisstjórnarflokkar en ekki þeir sem reyna að komast til botns í þessum vanda.