Staða barna með íslensku sem annað mál í leik- og grunnskólum Virðulegi forseti. Ég deili áhyggjum sem komu fram hjá hv. málshefjanda, Jóni Pétri Zimsen, af þeim hópi barna, vaxandi hópi, sem talar íslensku sem annað tungumál. Ef hann nær ekki tökum á því er það auðvitað honum sjálfum mest til baga en líka samfélaginu þegar þessi hópur er orðinn svo stór. Við getum hreinlega óttast hvernig okkar samfélag þroskast á næstu árum ef allt að 20% þeirra sem eru í skólakerfinu geta ekki tekið þátt á jafnréttisgrundvelli á við hina til að sækja fram í nýsköpun og menntun og íþróttum og hvað það er sem við erum að sækjast eftir. Ég hef áhyggjur af því að við horfðum upp á fjárlög síðasta árs og þá átti þetta ár að enda í 27 milljörðum en stefnir í 67. Síðan koma hér skilaboð um hallalaus fjárlög. Við vitum að framhaldsskólakerfið er vanfjármagnað. Við vitum að MMS er að gera mjög góða hluti en vantar meira fjármagn, m.a. til að framleiða enn meira af samræmdu námsefni, sem ég heyri að kennararnir eru að kalla eftir þar sem ríkisstjórnin og hæstv. ráðherra hafa skorið niður peninga til farsældarinnar um 1,1 milljarð inn í jöfnunarsjóðinn og segja bara: Sveitarfélögin eiga að gera þetta. Við vitum að skólakerfið hringinn í kringum landið er að glíma við ólíka hluti. Það eru litlir skólar með stóran hóp af börnum með erlendan uppruna. Ég hef áhyggjur af því að falleg orð dugi ekki til, hæstv. ráðherra. Ég hef áhyggjur af því, sem við í Framsókn lögðum reyndar til í fjárlögum síðasta árs, að bæta 200 milljónum ofan á það sem átti að fara til íslenskukennslu. Það þarf líka, við megum ekki gleyma því, að kenna foreldrunum af því að þeir eru í samskiptum við börnin og kennarana í skólanum. Við lögðum til nýja mælikvarða og ég hvet hæstv. ráðherra til að skoða það, bæði markmið sem voru skýrari en komu fram í fjármálaáætlun og fjárlögum og mælikvarða, því að ég trúi því ekki að það sé bara hægt að segja að þetta gangi betur af því að við tölum um það, henda síðan boltanum yfir til sveitarfélaganna og segja: Þið getið bara gert þetta. Ríkið verður að bera ábyrgð.