aðgerðaáætlun vegna offitu á Íslandi fyrir árin 2026--2030 Virðulegur forseti. Ég þakka hæstv. ráðherra fyrir sína yfirferð. Við þekkjum svo sem þessa tillögu frá fyrra þingi. Mig langar að fagna því að þetta sé að koma fram. Það er margt mjög jákvætt í þessu og við vitum að þetta er lýðheilsumál og að forvarnir og lýðheilsa borgar sig til lengri tíma. Það er margsannað mál og í þessum tiltekna málaflokki, offitu á Íslandi, er sérlega brýnt að gera allt sem hægt er til að fræða og bæta ástandið. Það er ekki gott að við séum hér á landi með þyngstu börnin á Norðurlöndunum. Það er eitthvað sem segir sína sögu og þarf að bregðast við. Ég tek sérstaklega undir það sem fram kemur í þessari tillögu, að forvarnir gegn offitu í ung- og smábarnavernd og í heilsuvernd skólabarna sé mikilvæg og geti skilað árangri og svo fræðsla og skimun ungmenna því að fræðsla til ungs fólks sem er að breytast í fullorðna einstaklinga og mataræðið og hreyfing og þetta allt saman hefur gríðarlega mikil áhrif á líðan þeirra og þroska. Það er því margt þarna sem maður getur vel tekið undir og það verður spennandi, áhugavert og gaman að taka á þessu máli í hv. velferðarnefnd. En mig langar til að spyrja ráðherrann, af því að það kemur þarna fram líka að það verði tekið mið af ráðleggingum Alþjóðaheilbrigðismálastofnunarinnar um notkun hagrænna hvata og m.a. fýsileika þess að lækka álögur á grænmeti og ávexti en einnig að hækka álögur á sérlega orkuríkar, næringarlitlar og gjörunnar matvörur. Mig langar að fá það fram frá ráðherranum hvort hún sé á þeirri skoðun að svokallaður óhollustuskattur eða sykurskattur sem var reyndur hér einu sinni sé eitt af því sem sé til alvarlegrar skoðunar og hvaða augum hæstv. ráðherra líti á það.