aðgerðaáætlun vegna offitu á Íslandi fyrir árin 2026--2030 Frú forseti. Ég vil byrja á að þakka hæstv. heilbrigðisráðherra fyrir að koma fram með þetta mál og fyrir sína framsögu, enda er margt afar gott í þessu máli eins og hv. þm. Rósa Guðbjartsdóttir kom inn á. En ég vildi kannski, eins og hv. þm. Rósa Guðbjartsdóttir, spyrja aðeins út í aðgerð nr. 1 í áætluninni sem snýr að notkun hagrænna hvata. Eins og kemur fram í tillögutextanum þá er markmiðið að lýðheilsustefna stjórnvalda taki mið af ráðleggingum Alþjóðaheilbrigðismálastofnunarinnar um notkun hagrænna hvata. Það virðist því vera markmiðið að koma á hagrænum hvötum en síðan stendur undir framkvæmd, með leyfi forseta: „Skipaður verði þverfaglegur starfshópur“ sem verði „falið að skoða fýsileika þess að lækka álögur“. Ég velti því fyrir mér hvað við erum nákvæmlega að tala um hérna, þ.e. ef við samþykkjum þessa tillögu. Hvað nákvæmlega yrði þessum starfshópi falið að skoða? Er það hvers konar hagrænum hvötum væri best að koma á eða hvort það sé fýsilegt að koma á hagrænum hvötum yfir höfuð? Ég vona að þessi spurning mín skiljist. Hæstv. ráðherra kom inn á það í sínu síðara andsvari hér áðan að sykurskatturinn sem var settur á fyrir 15 árum hefði verið illa útfærður. Þá ætla ég bara að leyfa mér að spyrja, af því að ég var ekkert mjög mikið að velta skattamálum fyrir mér fyrir 15 árum: Af hverju var sá sykurskattur illa útfærður?