landsáætlun vegna sjaldgæfra sjúkdóma fyrir árin 2027--2031 Frú forseti. Ég vil byrja á að þakka hæstv. heilbrigðisráðherra fyrir góða framsögu og ég þekki þetta mál reyndar aðeins. En mig langar til að spyrja hæstv. ráðherra — við erum hér að ræða um sjaldgæfa sjúkdóma. Hér á Íslandi erum við kannski að tala um örlítið mengi sjúklinga, jafnvel innan við 200 manns, ef ég skil þessa tölfræði rétt. Mig langar að nefna að við höfum notið þeirra gæða hér á Íslandi að hafa mjög öfluga og framsækna stofnun sem hét Íslensk erfðagreining, en heitir væntanlega öðru nafni í dag. Ég velti fyrir mér, af því að mér hefur fundist það í gegnum tíðina vera skýrt dæmi um hvernig hægt er að eiga samstarf við einkaframtakið, hvort hæstv. ráðherra sjái einhvern flöt á slíku til framtíðar og hvort slíkt verkefni gæti þá jafnvel farið fram á stærri grundvelli en bara að við bindum Ísland eitt og sér inn í það mengi.