landsáætlun vegna sjaldgæfra sjúkdóma fyrir árin 2027--2031 Forseti. Ég þakka hv. þm. Ólafi Adolfssyni fyrir andsvarið. Vissulega eru sjaldgæfir sjúkdómar sjaldgæfir en þeir eru svo margir og safnast þegar saman kemur, þannig að það eru alveg örugglega nokkur hundruð hér á Íslandi með þessa sjúkdóma. Þá má geta þess að í félaginu Einstök börn eru 1.000 meðlimir og þar eru auðvitað ættingjar á meðal og á þeirra vefsíðu eru núna 500 greiningar. Hv. þingmaður spurði um aðkomu Íslenskrar erfðagreiningar, sem nú er auðvitað í eigu Amgen. Þar liggja auðvitað mikil gögn og ég mun mæla fyrir annarri þingsályktun um einstaklingssniðna heilbrigðisþjónustu. Þar er meiningin að nálgast gögn hjá Íslenskri erfðagreiningu og þar er gott samtal í gangi til að nýta þau til þess að sinna svokölluðum meðferðarbærum arfgerðum, þ.e. erfðabreytingum sem valda sjúkdómum sem eitthvað er hægt að gera við. Þannig að þetta samstarf er í gangi og það tengist vissulega þessu, en Íslensk erfðagreining sá áður um ýmsar greiningar. Það er ekki lengur eftir að Amgen kom að, en verið er að byggja það upp á Íslandi. En ég sé tækifæri í að við fáum að nýta gögn hjá Íslenskri erfðagreiningu og þannig var það auðvitað hugsað þegar það fór af stað, að þessi gögn yrðu nýtt í þágu íslensks almennings, og verður betur fjallað um þetta í þeirri þingsályktunartillögu sem ég nefndi.