hækkun kílómetragjalds Frú forseti. Samfylkingin ætlar ekki að hækka skatta á vinnandi fólk; þetta sagði hæstv. forsætisráðherra fyrir síðustu kosningar. Þá átti að lækka kostnað heimilanna og taka til í ríkisrekstrinum. Nú leggur ríkisstjórn hennar til að kílómetragjaldið hækki um tæplega 16% um næstu áramót. Það er meira en sexfalt verðbólgumarkmið Seðlabankans. Í greinargerð ríkisstjórnarinnar kemur skýrt fram hvað liggur að baki. Ofan á verðlagsuppfærslu á að sækja 4 milljarða kr. til viðbótar með hækkun gjaldsins. Þetta er skattahækkun á fólkið í landinu; foreldra sem aka börnum sínum í skólann, fólk sem sækir vinnu milli byggðarlaga og alla þá sem treysta á bílinn til að koma sér á milli staða á hverjum degi. Þetta fólk getur ekki einfaldlega hætt að keyra þótt ríkisstjórnin hækki reikninginn. Félag atvinnurekenda hefur sérstaklega varað við því að hækkunin auki flutningskostnað og þrýsti vöruverði upp. Álagið lendir þannig bæði á heimilum og fyrirtækjum sem eiga að skapa störf og verðmæti. Ríkisstjórnin hefur nú boðað að takmarka hækkanir annarra gjalda við 2,5% en þó með miklum fyrirvörum. Ekkert liggur samt fyrir um lækkun kílómetragjaldsins. Frú forseti. Það verður að vera samhengi á milli þess sem forsætisráðherra lofar fólki og þess sem ríkisstjórnin leggur til. Hvernig réttlætir hæstv. forsætisráðherra þá ákvörðun ríkisstjórnarinnar að sækja 4 milljarða kr. til viðbótar til heimila og fyrirtækja með hækkun kílómetragjaldsins þegar hún lofaði að hækka ekki skatta á vinnandi fólk?