hækkun kílómetragjalds Frú forseti. Ég þakka hæstv. forsætisráðherra fyrir svarið sem þó var ekki. Spurningu minni var hreinlega ekki svarað heldur er alltaf farið í sama rann. Það er alltaf bent á verk fyrri ríkisstjórnar, alltaf. Og hér kemur hæstv. forsætisráðherra og talar um enn eitt samheitið yfir það sem ríkisstjórnin notar yfir skattahækkanir. Virðulegi forseti. Ég vil fá að minna á að árið 2022 skrifaði hæstv. ráðherra, þá þingmaður, Jóhann Páll Jóhannsson, í nefndaráliti að gjaldahækkanir legðust þyngst á tekjulægri heimili. Í nefndarálitinu segir, með leyfi forseta: „Þannig eru sömu hóparnir og finna sárast fyrir verðbólgunni líka látnir bera herkostnaðinn af baráttunni gegn henni.“ Þetta voru rök Samfylkingarinnar þegar hún var í stjórnarandstöðu. Nú boðar ríkisstjórn undir hennar forystu tæplega 16% hækkun kílómetragjaldsins. Forsætisráðherra lofaði að hækka ekki skatta á vinnandi fólk. Nú hækkar ríkisstjórn hennar reikninginn hjá fólki sem þarf að komast til vinnu. Ég spyr því hæstv. forsætisráðherra: Hvað hefur breyst frá árinu 2022 sem réttlætir að leggja þessar byrðar á tekjulægri heimili eða giltu þessi sjónarmið Samfylkingarinnar aðeins meðan aðrir báru ábyrgð á skattahækkununum?