hækkun kílómetragjalds Hæstv. forseti. Það stendur til núna, í samráði við verkalýðshreyfinguna, að gera breytingar á krónutölugjöldum, flöt gjöld. Það er alveg rétt sem hér er sagt og ég fagna því ef þetta er viðhorfsbreyting sem er komin upp í Sjálfstæðisflokki, að það eigi mögulega frekar að fara í þrepaskiptingu í skattkerfinu en flöt gjöld. Það er alveg rétt að sú sem hér stendur vill síður fara í flata skattlagningu. Hér er hins vegar um langtímastefnumörkun að ræða sem hófst m.a. í tíð síðustu ríkisstjórnar og felur í sér kerfisbreytingu sem upphaflega, eins og ég fór yfir í mínu fyrra svari, sneri einmitt að því að færa aukið réttlæti í gjaldtöku vegna vegakerfisins þar sem fólk gat í rauninni keypt sig út úr kerfinu. Efnað fólk sem gat keypt sér nýjan rafbíl, gat verið á sparneytnari bíl, keypti sig að hluta til út úr kerfinu á meðan þeir sem voru á notuðum eldri bílum og gátu ekki endurnýjað bílana sína voru fastir í olíugjaldskerfinu, olíugjaldinu sem nú er búið að fella niður og allt of sjaldan er rætt um í þessu samhengi. Þannig að það var sanngirnismál að innleiða þetta á sínum tíma, mál sem hófst í gegnum síðustu ríkisstjórn og Samfylkingin studdi í minni hluta sem meiri hluta, ólíkt öðrum sem hér sitja sem hreyfast eftir því hvort þeir sitja öðrum megin við borðið. Þetta er langtímakerfisbreyting sem er jákvæð. Við erum að færa krónutölugjöld almennt niður í 2,5% að öðru óbreyttu, ef samningar halda og við sjáum jákvæðar hreyfingar núna í vikunni. En þetta er annað mál.