afsögn fyrrverandi mennta- og barnamálaráðherra Herra forseti. Ég þoli ýmislegt í þessum sal en ég þoli ekki þegar verið er að klaga upp á mig að ég hafi sagt eitthvað sem er ekki satt. Hér er allt ritað upp eftir manni. Við skulum bara hafa það alveg á hreinu að það er alveg vitað hvað ég sagði hér áðan. Ég sagði að formenn hefðu rætt saman en ekki um hvað. Ég stóð hér í pontu sjálf þegar kom upp heilsubrestur á ríkisstjórnarheimilinu þegar viðkomandi þáverandi ráðherra þurfti að fara í aðgerð á sínum tíma. Þetta eru erfiðar aðstæður sem koma upp. Auðvitað þegar koma upp svona aðstæður á stjórnarheimilinu sest fólk saman og ræðir málin, en ekki hvað? Þetta hefur áhrif á stjórnskipan landsins, þetta hefur áhrif á hvernig ráðuneytum er sinnt. Það er fullkomlega eðlilegt og til marks um heilbrigði í stjórnarsamstarfi að formenn ræði saman um hver staðan er. Það breytir því ekki að ég hef sagt frá hér inni, þar sem maður segir satt í þessari pontu og eftir manni er skrifað, að við ræddum saman um stöðu sem upp var komin og ræddum síðar við hv. þingmann um þá stöðu. Í kjölfarið, einhverju seinna, ég er ekki með þá tímalínu skrifaða upp á punkt og prik, þá segir viðkomandi af sér á sínum forsendum og hann hefur sjálfur sagt það.