aðgerðir einkaaðila Virðulegi forseti. Undanfarna daga hafa fjölmiðlar fjallað um þjáningar fólks á biðlistum eftir bakaðgerðum. Læknar hafa stigið fram og lýst því að sjúklingar þeirra búi við verulega skert lífsgæði og gangi um mánuðum saman haltrandi. Fólk sem er vant mikilli hreyfingu komist ekki lengur sjálft í búðina. Læknar lýsa því hvernig fullorðið fólk hreinlega grætur yfir ástandinu. Sjúkratryggingar hafa keypt þessar bakaðgerðir af einkaaðilum í kjölfar þess að ljóst varð að Landspítalinn gæti ekki annað eftirspurn, m.a. vegna skurðstofuvanda. Markmiðið var að auka getu heilbrigðiskerfisins og stytta biðlista. Sjúkratryggingar hafa metið þörfina fyrir aðgerðir og Orkuhúsið brugðist við kallinu. Í kjölfar lengri samninga við Sjúkratryggingar fjárfesti Orkuhúsið í aðstöðu, búnaði og mannafla til þess einmitt að aðstoða ríkið við að mæta þörfum sjúklinga. Kvótinn fyrir árið 2026 varð hins vegar mun minni en árið á undan, minni en mat Sjúkratrygginga og kláraðist hjá Orkuhúsinu í maí síðastliðnum. Því bíður stór hópur sjúklinga eftir aðgerð og kemst hvergi að. Ákvæði í samningum meina þeim síðan að gera aðgerðir utan kvótans. Fullkominn skurðaðbúnaður er því vannýttur í þessari biðstöðu. Biðlistar eftir þessum nauðsynlegu aðgerðum leiða til skertra lífsgæða og starfsgetu, aukinnar lyfjanotkunar og aukins álags á aðra heilbrigðisþjónustu. Biðin getur haft áhrif á batahorfur og getur jafnvel leitt til varanlegs skaða eða örorku. Það er mikilvægt að hæstv. ráðherra svari fyrir þessa stöðu og svari þessu sárþjáða fólki sem bíður eftir nauðsynlegri heilbrigðisþjónustu. Af hverju bíður þetta fólk fyrst Orkuhúsið getur tekið við því? Af hverju?