aðgerðir einkaaðila Hæstv. forseti. Ég þakka hv. þm. Diljá Mist Einarsdóttur fyrir spurninguna. Auðvitað er erfitt að hlusta á þessar sögur en staðreyndin er sú að þessum aðgerðum hefur verið fjölgað. Áður voru það Sjúkrahúsið á Akureyri og Landspítalinn sem gerðu bakaðgerðir en nú hefur verið samið ekki bara við Orkuhúsið heldur líka við Klíníkina um þessar tilteknu aðgerðir að undangengnu opnu innkaupaferli. Það eru vissulega ákvæði í þessum samningum, t.d. um að það eigi að dreifa aðgerðum jafnt yfir árið og ekki að taka fram hjá kerfinu. Ef brýn nauðsyn krefur getur þjónustuaðili samt sótt um undanþágu til Sjúkratrygginga. Síðan er það líka þannig að ef aðgerðakvótinn er búinn á öðrum staðnum þá ætti auðvitað að vísa skjólstæðingum á hinn aðilann. Sjúkratryggingar eru með þessi mál í stöðugri skoðun og við höfum rætt það nýverið að það þurfi kannski tvennt til núna. Það er annars vegar að koma á miðlægum, samræmdum biðlista fyrir bakaðgerðir. Ég hef margoft lýst því í þessum sal hversu mikil innviðaskuld er í heilbrigðiskerfinu. Hún er m.a. í rafrænum kerfum og skorti á yfirsýn eins og í þessu tilfelli. Síðan þyrftum við að endurtaka þarfagreiningu og meta hvort fjölga þurfi aðgerðum en það voru 200 aðgerðir sem var skipt á milli Stoðkerfis, sem er Orkuhúsið, og Klíníkurinnar. Þegar þetta var ákveðið var m.a. horft til gagna um tíðni aðgerða erlendis en eins og ég segi, það getur alltaf þurft að endurmeta.