aðgerðir einkaaðila Virðulegi forseti. Ég þakka hæstv. ráðherra fyrir svarið. 200 aðgerðir er samt minna en mat Sjúkratrygginga Íslands. Við getum þrasað um þetta fram og til baka, við getum rætt miðlæga biðlista enn og aftur. Staðreyndin er samt sú að sárþjáð fólk bíður eftir því að komast í aðgerð, kemst hvergi að og biðin er í boði hæstv. heilbrigðisráðherra sem ber ábyrgð á þessu ástandi. Orkuhúsið hefur mannafla, búnað og aðstöðu til að skera meira upp. Svo einfalt er það. Það eina sem virðist standa í vegi fyrir því að þessir sjúklingar, sem við lesum nú sögur af og eru mjög átakanlegar, fái heilbrigðisþjónustu virðast vera fordómar í garð einkaframtaksins. Það blasir við. Þetta er ekki fyrsta samtal sem ég á hér við hæstv. ráðherra um þetta. Og við skulum athuga að það þurfa ekki allir að bíða. Þeir sem geta reitt fram yfir milljón kr. fyrir aðgerð geta keypt þessa þjónustu af einkaaðilum, m.a. erlendis. Það er ekkert annað en tvöfalt heilbrigðiskerfi og það er líka í boði hæstv. heilbrigðisráðherra. Er þetta ásættanlegt? Ætlar hæstv. heilbrigðisráðherra ekki að koma þessu fólki til bjargar, ekki með miðlægum biðlistum eða þarfagreiningu heldur með einföldum aðgerðum?