arðgreiðslustefna Landsvirkjunar Frú forseti. Forstjóri Landsvirkjunar tilkynnti í síðustu viku að hann hygðist stíga frá borði eftir 17 farsæl ár þar við stjórnartaumana. Síðan hafa að mörgu leyti vaknað fleiri spurningar með svörum og viðbrögðum annaðhvort þeirra sem sitja í stjórn Landsvirkjunar eða stjórnmálamanna sem hafa tjáð sig þar um. Það vakti athygli mína þegar ég fór að skoða málið, í ljósi þess að ýmsir hafa áhyggjur af því að ríkisstjórnin sjái fyrir sér að fara orkuveituleið Reykjavíkurborgar og auka umtalsvert arðgreiðslur Landsvirkjunar til að rétta af fjárhag hins opinbera, að 21. apríl sl. virðist vera lykildagur í lífi Landsvirkjunar nú um stundir. Á þeim degi var gerð á aðalfundi tillaga um 165 milljón dollara arðgreiðslu, sem er vel á þriðja tug milljarða, og á sama degi samþykkti stjórn Landsvirkjunar nýja arðgreiðslustefnu sem virtist þrengja töluvert að svigrúmi til arðgreiðslna fyrirtækisins inn í ríkissjóð. Mig langar í því samhengi að spyrja hæstv. ráðherra hvort hann hafi fengið einhverjar skýringar á því hvers vegna þetta kemur fram í tillögu, er samþykkt í stjórn strax í febrúar, þessi 165 milljón dollara arðgreiðsluákvörðun, og 3. mars er hún tekin fyrir á ársfundi aftur en staðfest þarna á aðalfundi. Hvað skýrir það að mati hæstv. forseta að stjórnin geri tillögu um hátt í 20% hærri arð heldur en arðgreiðslureglur sem voru samþykktar þennan sama dag kveða á um? Það er eitthvað sem kallar á skýringar þarna og ég vona að hæstv. ráðherra treysti sér til að útskýra hvernig á því stendur að arðgreiðslukrafan sé hátt í 20% hærri en arðgreiðslustefna sem var samþykkt þennan sama dag kveður á um.