stjórnsýslulög Virðulegur forseti. Ég þakka hv. þingmanni fyrir ágætar spurningar. Hvað varðar persónuverndarreglugerðina er það rétt að ég flutti hér frumvarp til laga um innleiðingu á þeirri reglugerð. Ég gerði það einmitt með þeim hætti sem ég tel þann eina boðlega við innleiðingu á Evrópu- eða EES-réttinum hér á Íslandi; ég lét þýða þessa reglugerð og hún var innleidd hér með sérstökum lögum um persónuvernd. Hún var sem sagt ekki innleidd eins og dæmi eru um undanfarin ár, sérstaklega núna á þessu kjörtímabili, sem er orðin lenska, að innleiða þessi mál með svokallaðri tilvísunaraðgerð, þ.e. að hér er bara lagt fram eitthvert frumvarp sem segir að einhver reglugerð úti í heimi sem Evrópusambandið hefur sett gildi hér. Og þetta hefur meira að segja verið borið á borð fyrir alþingismenn hér inni á Alþingi, jafnvel með þeim hætti að það er vísað í reglugerðina sem á að innleiða óþýdda og hún hefur verið birt í lagasafni Alþingis á alþingisvefnum. Þegar menn smella á reglugerð birtist þar ítrekað óþýdd reglugerð eða tilskipun. Það er algjörlega óboðleg aðferð en persónuverndarreglugerðin var sem sagt innleidd með þessum hætti, eins og ég segi, og það þýðir að sá texti gildir þá hér á Íslandi. Texti laganna gildir. Hann gildir hér. Að mínu mati er það þannig að hafi orðið einhver handvömm við þýðinguna, sem kann alveg örugglega að vera, breytir það því ekki að sá óskýri texti mun gilda umfram reglugerðartexta sem er erlendis. Aðrar spurningar voru líka góðar og ég ætla að svara þeim, þ.e. hvaða breytingar ég gæti séð á þessu frumvarpi.