stjórnsýslulög Virðulegur forseti. Dómstólar eiga ekki að setja lög eða reglur. Það er ekki hlutverk dómstóla. Úrskurðarnefndir eiga ekki að setja lög eða reglur. Það er ekki hlutverk þeirra. Og EFTA-dómstóllinn eða Evrópudómstóllinn á svo sannarlega ekki að setja lög og reglur á Íslandi. Löggjöfin, lagasetningin, fer fram hér á Alþingi og það er Alþingi sem setur reglurnar. Það kann að vera að gerð séu mistök við lagasetningu. Það er alþekkt, mörg dæmi um það. Þá er það bara lagað. Af því að hv. þingmaður spyr: Hvernig eigum við að lifa við þessa einsleitni, að íslensk lög séu ekki eins og EES-rétturinn? Það er alveg rétt, þá bara lögum við það þegar þau vandamál koma upp. Einsleitnin hefur ekkert endilega fengist með Evrópudómstólnum eða EFTA-dómstólnum. Mér hefur virst þessir dómstólar, Evrópudómstóllinn sérstaklega, bara skipta um skoðun og búa til nýjar reglur mörgum árum eftir að reglurnar hafa verið settar í Evrópusambandinu. Ég tek sem dæmi reglugerð Evrópusambandsins um samræmingu almannatryggingakerfa sem var hér til umfjöllunar í fæðingarorlofsmálinu. Það mál var að velkjast um í Evrópusambandinu og Evrópusambandsríkjunum, hægri, vinstri og hjá Evrópudómstólnum og hann gat ekki einu sinni gefið skýrt svar í fyrsta svari sínu heldur tók það mörg ár að breytast. Hv. þingmaður nefnir hér persónuverndarlögin, ég er svo sannarlega ekki stolt af þeim, alls ekki. Ég tók það sérstaklega fram, þegar ég flutti framsögu um það mál, að það væri mjög brýnt að endurskoða þau lög innan mjög skamms vegna þess að þar var kastað til höndum af hálfu Evrópusambandsins og settar reglur sem eru óaðgengilegar og óframkvæmanlegar öllum ríkjum. Það hefur komið í ljós á Íslandi og annars staðar í Evrópusambandinu. Ég veit ekki betur en að Evrópusambandið sé að hysja upp um sig núna og endurskoða allt það bákn sem fólst í þeirri reglugerð.