Hagstofa Íslands og opinber hagskýrslugerð Frú forseti. Ég mæli hér fyrir frumvarpi til laga um breytingu á lögum um Hagstofu Íslands og opinbera hagskýrslugerð. Frumvarpið felur það eitt í sér að fella brott skyldu sem í dag hvílir á Hagstofunni um að starfrækja sjálfstæða rannsóknareiningu sem ætlað er það hlutverk að fylgjast með afkomu þjóðarbúsins, semja þjóðhagsspár og áætlanir og birta opinberlega. Hér er því um einföldunarmál að ræða sem gefur færi á að styrkja Hagstofuna og efla kjarnastarfsemi hennar án þess að til komi aukin útgjöld úr ríkissjóði. Ástæða þess að mikilvægt er að fella brott skyldu Hagstofunnar til starfrækslu sjálfstæðrar rannsóknareiningar og hætta útgáfu þjóðhagsspáa þar er sú að frá og með þessu ári hafa áætlanir í opinberum fjármálum byggt á þjóðhagsspá Seðlabanka Íslands. Þær aðstæður eru því ekki lengur fyrir hendi að nauðsynlegt sé að Hagstofan gefi út þjóðhagsspár. Með hliðsjón af því er skynsamlegt að fella brott skyldu Hagstofunnar til útgáfu þjóðhagsspáa, einfalda starf hennar og koma í veg fyrir tvíverknað í starfi hins opinbera. Forseti. Áréttað skal að sú breyting sem verður á starfi Hagstofunnar, verði frumvarpið að lögum, er einungis sú að þjóðhagsspár á vegum hennar munu ekki koma út lengur en Hagstofan mun að sjálfsögðu áfram fylgjast með afkomu þjóðarbúsins og sinna öðrum lögbundnum hlutverkum sínum. Með þeirri einföldu breytingu sem lögð er til með frumvarpi þessu er komið í veg fyrir tvíverknað í starfsemi hins opinbera en undanfarin ár hafa bæði Hagstofan og Seðlabankinn gefið út þjóðhagsspár með reglulegum hætti. Þessar spár hafa jafnan verið áþekkar og byggja á sama spálíkani eða meginspálíkani. Þessi breyting á starfi Hagstofunnar sem frumvarpið ber með sér er lögð til í góðu samstarfi og samráði við stofnunina sjálfa. Fátítt er að hagstofur í nágrannaríkjunum hafi það hlutverk að gefa út þjóðhagsspár, enda er það verkefni utan kjarnaverksviðs þeirra sem felst í því að vinna að hagtölugerð og samræma hana þvert á stjórnkerfið. Forseti. Líkt og rakið er í almennum athugasemdum með frumvarpinu á ákvæðið sem hér er lagt til að fellt verði brott uppruna sinn til áranna eftir efnahagsáfallið 2008 og þeirra umbóta í umgjörð efnahagsmála og hagstjórn sem þá var ráðist í. Var þá talið rétt að fela Hagstofunni sem óháðum og sjálfstæðum aðila það hlutverk að gefa út þjóðhagsspár sem nýst gætu stjórnvöldum við stefnumótun og hagstjórnarákvarðanir. Á þeim tíma sem liðinn er síðan hafa margvíslegar aðrar umbætur verið gerðar í umgjörð og stjórn efnahagsmála. Setning nýrra laga um opinber fjármál árið 2015 var mikið framfaraskref en í þeim er kveðið á um að stefnumörkun í opinberum fjármálum, þ.e. fjármálastefna og fjármálaáætlun, skuli byggjast á traustum forsendum og gögnum sem unnin eru hlutlægt og kerfisbundið og með opinberum hagtölum og þjóðhagsspá. Frá setningu þeirra árið 2015 og allt fram til ársins 2026 hafa þjóðhagsspár Hagstofunnar verið lagðar til grundvallar þessari stefnumörkun. Líkt og fram hefur komið byggjast forsendur fjármálastefnu og fjármálaáætlunar nú á þjóðhagsspám sem Seðlabanki Íslands birtir samkvæmt ákvörðun fjármála- og efnahagsráðherra. Það þýðir einnig að stefna í opinberum fjármálum og peningastefnan byggjast nú á sömu forsendum. Forseti. Það er mitt mat að umgjörð um mótun efnahagsstefnu stjórnvalda hafi styrkst við þetta enda fylgja því ótvíræðir kostir að þessir tveir armar hagstjórnarinnar, fjármálastefnan og peningastefnan, byggi ákvarðanir sínar á sömu grunnforsendum. Seðlabankinn birtir ítarlegar þjóðhags- og verðbólguspár fjórum sinnum á ári en auk þess birta stóru viðskiptabankarnir þrír einnig reglulega þjóðhagsspár auk alþjóðastofnana á borð við Alþjóðagjaldeyrissjóðinn. Brotthvarf þjóðhagsspáa Hagstofunnar hefur því enga grundvallarbreytingu í för með sér fyrir aðra notendur þjóðhagsspáa og er án allra vandkvæða fyrir stjórnvöld. Forseti. Að endingu legg ég til að frumvarpi þessu verði vísað til efnahags- og viðskiptanefndar að lokinni þessari umræðu.