Hagstofa Íslands og opinber hagskýrslugerð Virðulegur forseti. Ég þakka hæstv. forsætisráðherra fyrir framsögu um þetta mál sem kann að vera hið besta mál. Mig langar hins vegar að spyrja hæstv. forsætisráðherra hvort það sé ekki tilefni til að spara smá peninga með þessu. Ég sé að í mati á áhrifum í frumvarpinu er nefnt að það verði komið í veg fyrir tvíverknað með því að leggja niður rannsóknareiningu Hagstofunnar og fjármunum og sérhæfðum mannauði verði varið með skynsamlegri hætti en áður. Hefur hæstv. forsætisráðherra einhverja hugmynd um hvar sú skynsemi muni liggja í framtíðinni? Svo langar mig líka að spyrja um annað sem tengist kannski Hagstofunni ekki beint eða þessu máli. Jú, það tengist auðvitað þessu máli þegar verið er að leggja niður þjóðhagsspá og einhverja líkanasmíði þessarar ríkisstofnunar. Á sama tíma er nefnt að fjármála- og efnahagsráðuneytið hafi ritað undir samkomulag við Seðlabanka Íslands í upphafi þessa árs sem felur í sér að Seðlabankinn muni veita ráðuneytinu upplýsingar sem liggja að baki spám bankans um hagstærðir sem hafa hingað til ekki verið birtar opinberlega en ráðuneytið notar í áætlunum sínum. Ég er aðeins að velta fyrir mér hvort aðhald fjármálaráðuneytisins sé kannski einhvern veginn fyrir borð borið með því að leggja niður þessa starfsemi Hagstofunnar, þótt auðvitað megi segja: Ja, Hagstofan er náttúrlega undir hæstv. forsætisráðherra og Seðlabankinn kannski að einhverju leyti líka en þó er annars konar samstarf á milli fjármálaráðuneytisins og Seðlabankans. Ég bara velti fyrir mér hvort hæstv. forsætisráðherra geti velt fyrir sér þessu aðhaldi með fjármálaráðuneytinu og hvort það verði hafið yfir alla gagnrýni og allan vafa að þau gögn sem þannig flæða á milli Seðlabankans og fjármálaráðuneytisins séu trúverðug.