Hagstofa Íslands og opinber hagskýrslugerð Frú forseti. Það var tekin talsverð umræða um þetta þegar það voru gerðar breytingar í fjármálaáætlun á sínum tíma og bara mjög eðlileg umræða því þetta skiptir lykilmáli. Í grófum dráttum var þetta þannig að hagspáin sem kom frá Hagstofunni var opinber. Hún var með svona helstu þætti þjóðhagsreikninga en síðan eru ákveðnir undirliðir á bak við sem eru kannski ekki allir birtir opinberlega en nýtast í frekari spágerð í fjármálaráðuneytinu. Það er ýmislegt sem fjármálaráðuneytið gerir í aðdraganda fjármálaáætlunar og fjárlaga, m.a. varðandi tekjuþróun, útgjaldaþróun og fleira svoleiðis sem er bara spágerð og hefur alltaf verið á vegum fjármálaráðuneytisins. En það sem snýr að þjóðarhagnum sérstaklega hefur verið hjá Hagstofunni og það eru ákveðnir undirliðir sem svona dælast þar inn og skapa lokaniðurstöðu. Og alveg eins og fjármálaráðuneytið fékk aðgengi að því hjá Hagstofunni þá fær ráðuneyti hluta af því frá Seðlabankanum í dag. En eins og ég sagði passar Seðlabankinn mjög mikið upp á sjálfstæði sitt og það var rætt mjög mikið fram og til baka hvað væri einmitt eðlilegt upplýsingaflæði þarna á bak við. En þetta er bara til þess fallið í rauninni að fjármálaráðuneytið geti unnið sömu vinnu og það gerði áður, unnið úr tölum Hagstofunnar í eigin spágerð sem er byggð á grundvallarforsendum þjóðhagsspár. En eins og ég segi, það er heilmikið í fjárlagagerð sem er á spáhliðinni, ef kalla má það svo, sem hafa alltaf í gegnum tíðina verið útreikningar fjármálaráðuneytisins, staðgreiðslugögn og annað slíkt sem er verið að miða við. Þetta er bara holl og góð umræða og ég hygg að það verði bara mjög jákvætt á næstu árum að sjá hvernig nýting á þessum spám hefur verið. En eins og ég segi, mér hafa kannski þótt mest sannfærandi rökin fyrir þessari breytingu þau að þetta var lítil spáeining, rannsóknareining, og hún byggði á meginlíkani Seðlabankans þannig að það var kannski ekki mikil viðbót sem kom þarna inn. Hagstofan, sem hefur farið úr um 126 starfsmönnum frá 2020 í 98 í dag, 30% fækkun, hefur ekki minnkað að verkefnaumfangi og þarf einfaldlega á öllu að halda núna varðandi starfsfólk.